Молитвенное правило о делах общины
Благочестивое правило о благом деле сплочения общины и возведения храма Божиего в честь иконы Царицы Небесной «Иверская» в первопрестольном граде Москве
Тропарь Вседержителю, глас 4
Тво́рче и Созда́телю вся́ческих, Бо́же, дела́ рук на́ших, ко сла́ве Твое́й начина́емая, Твои́м благослове́нием спе́шно испра́ви, и нас от вся́каго зла изба́ви, я́ко еди́н всеси́лен и Человеколю́бец.
Тропарь Божией Матери, глас 1
От святы́я ико́ны Твоея́, о Влады́чице Богоро́дице, исцеле́ния и цельбы́ подаю́тся оби́льно с ве́рою и любо́вию приходя́щим к ней, та́ко и на́шу не́мощь посети́, и ду́ши на́ша поми́луй, Бла́гая, и те́ло исцели́ благода́тию Твое́ю, Пречи́стая.
Сла́ва Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь.
Кондак, глас 3
Ско́рый в заступле́ние и кре́пкий в по́мощь, предста́ни благода́тию си́лы Твоея́ ны́не, и благослови́в укрепи́, и в соверше́ние наме́рения блага́го де́ла рабо́в Твоих произведи́: вся бо, ели́ка хо́щеши, я́ко си́льный Бо́г твори́ти мо́жеши.
Молитва ко Творцу и Создателю
Го́споди Иису́се Христе́, Бо́же наш, приими́ усе́рдное моле́ние на́ше и благослови́ благо́е наме́рение и де́ло рабо́в Твои́х по созида́нию общи́ны, возведе́ния хра́ма Твоего́ для просвеще́ния наро́да Твоего́ в духо́вных си́лах к го́рнему восходя́ща, е́же благополу́чно нача́ти, и без препя́тия вся́каго ко сла́ве Твое́й соверши́ти сподо́би. Де́лателем благопоспеши́ и дела́ рук их испра́ви, и в соверше́ние си́лою Пресвята́го Твоего́ Ду́ха спе́шно произвести́ сотвори́!
Твое́ бо есть, е́же ми́ловати и спаса́ти ны, Бо́же наш, и тебе́ сла́ву возсыла́ем со Безнача́льным Твои́м Отце́м и Пресвяты́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.
